Hochzyt Melanie & Ändi mit allem drum & dra
Sali zämme
Mir begriesse Eych härzlig uf unserer Hochzyts-Wäbsyte. Wär das nonig so rächt mitgriegt het, isch aigendlig sälber tschuld :) . Spass bi Syte, d'Melanie & dr Ändi hänn sich nach über 11 Joor im Konkubinat am 11.11.11 am viertel vor 11 an dr Rittergass 11 (Standesamt Basel-Stadt) s'Jo-Wort geeh.
Vorgängig aber het dr Ändi im Februar 2011 em Melanie in Mandelieu an dr Côte d'Azur, zmitts in de Mimose e Aadraag gmacht. So wie's ussgseht, het si sich richtig entschiede :) .
Aigendlig mechte mir nid z'lang um e Saich umme schnuure, sondern Eych e bitzli umme seerfe loo. Sälli Wäbsyte isch drum dänggt, dass die wo nid hännd kenne derby sy, oder die wo's nomol wänn revue-passiere loo, e bitzli kenne an unserer Hochzyt Dail ha. Was au immer aim am Beschte basst, Fottene aagiggsle, nomol dr Usschnitt vom 7vor7 oder dr Hochzytsvideo (made by Roger) yyne zieh, oder villicht au numme unseri ussgwählte und zer Hochzyt passende Liedli loose. Mir winsche Eych vyyl Vergniege.
An dere Stell mechte mir uns nomol bi unsere Eltere bedangge, die wo immer fir uns do sin und uns unterstitze, sowie bi de Trauzyyge: Unserem liebe Sohn Morris und dr liebe Trish, sie wo s'ganz Dessäärbuffet mit Härzbluet sälber gmacht het, em Mischa, wo unseri Ring gschmiedet het und am Apéro fir's lyblige Wohl bsorgt gsi isch, de baide Dame, dr Gabrielle, wo d'Brut professionell gschminggt het, und bi dr Sandra, wo us de Glashoor vom Melanie e saumässigi Fryyse zauberet het, em Andreas & dr Isa fir e Brutstruss und dr Autischmugg und dr Barbara-Clique fir dr Käller. Drzue bi de viele Frinde wo dä Daag uf Zelluloid, Speicherkarte oder Film feschtghalte hänn und bi Dene wo am 11.11.11 uf em Standesamt drby gsi sin. Und zem Schluss no bi Alle wo uns ebbis Guets do hänn, e grosses härzligs DANGGERSCHEEN.
Wenn Dir uns mechtet e Mail schigge, so gligget doch oobe aifach ebber aa, und brichtet uns was ihr uf em Härzli hännd.
Jetz winsche mir Alle vyyl Spass uf unserer Syte.
Melanie & Ändi
